Dynasty Warriors Next (Vita, Asia Import)

Sodeli, i ha jetze die letzte paar Täg sehr vieli Vita Spieli gspiut u mi nid würkli chönne entscheide, weles i als nächschts wett reviewe, ersch recht welli die meischte nid ferti gspiut ha. Army Corps of hell isch es “Metaller Pikmin” wo recht schnell eitönig wird. Everybodys golf 6 isch sicher super für Fans, aber mir wird au das zschnell eitönig. Shinobido 2 findi recht lahm. Ultimate Marvel versus Capcom 3 isch halt eifach e Port wie au Disgaea 3. Letzteres isch zwar mi lieblings Vita-Titel, aber en Port zreviewe isch geng chli schwierig. Also hani mi fürs Dynasty Warriors Next entschiede. Wenn öbber es genauers Review zu de andere Spieli wetti, eifach melde, chani uf Afrag sehr gern mache :)

dDynasty Warriors Serie gits scho sit 1997 und spiut i dr Ziit vo de 3 Königrich, so ca. 208 bis 280 in China. Zu dere Ziit hei 3 Königrich, Shu, Wu und Wei um dHerrschaft über China gkriegt. Während dr erscht Teil e Fighter und dr 2. Teil es Strategie-Spieli si gsi, het sich dSerie denne abem dritte Teil ine moderni Version vo de Beat em’ Ups mit RPG Element entwicklet, was mire Meinig nach dr beschti Asatz für die Gschicht isch. Sitem 3 wo 2002 für dPS2 isch use cho, hets inzwüsche sehr viu witeri Teili geh. So gits inzwische 7 Dynasty Warriors us dr Hauptserie wo wiederum Erwiterige hei, witeri Dynasty Warriors wie eis wo z.B. es MMORPG isch und sogar ganz neui Reihene wie Samurai Warriors weles bi de Japaner spielt oder Gundam wo dGundam Serie abdeckt. Es git denne sogar nah e cross-over Serie wo Orochi Warriors heisst u dCharaktere vo Samurai und Dynasty Warriors verbindet. Entwicklet isch au de Teil wieder vo Koei. Aber chömme mir emau zum Spieli selber:

Sehr Guet Dynasty Warriors Next isch schwer zbewerte. sSpieli selber ghört sicher zu de beschte Spieli vo dr Serie und isch gwüssermasse sowas wie e Empire Version zum Dynasty Warriors 7 Extreme Legends. sSpieli bietet mit de Touch Kommandos interessanti Neuerige wie en 2te Musou Agriff oder en alternative zum normale Kreis-Musou Agriff. Usserdem het sSpieli Minigames wo mit Touch Screen funktioniere.  sSpieli ersetzt usserdem dr Lebendsbalke mit regenerierendem Lebe. Die oft ghörti Kritik, dass dDynasty Warriors geng sgliche si, chani generell nid akzeptiere, well das bi aune Seriene so isch. Dynasty Warriors schaffts, mit neue Element selbst nach fasch 10 Jahr witerhin interessanti Titel zerschaffe. sSpiel liided jedoch a störende Popups. Für Fans es must-have und für Lüt wo dSerie nid kenne und uf Beat em’ Ups stöh sehr empfehlenswert. Wer aber mit de Vorgänger nüt cha afah, wird au damit nüt chönne afah.

Rating: ★★★★★★★★☆☆ 


*Fürs Rating gilt 5 als Durchschnittswert

Dynasty Warriors Next

Dynasty Warriors Next

Dynasty Warriors Next laht sich wie obe erwähnt am eifachschte als moderns Beat em’ Up mit RPG Element beschriebe. Meh suecht sich usemene Huufe vo Charaktere eine us u zieht damit ine Schlacht gege 100i oder gar 1000i vo Gegner. Die meischte vo dene Gegner si relativ schwach u göh nach wenige Schleg scho kaputt, wobi die meischte Schleg vieli Gegner ufs Mau treffe. Nebe de schwache Gegner gits denne au nah Offiziere wo so ne Art (Mini-)Boss si. Anderi Gegner triggere en Touch-Screen Event wome z.B. muess Pfile abwehre oder meh het es Duell gege en Offizier wome mit Touch Kommandos kämpft. Gegner sammle sich in Base, wo au neui Gegner generiert werde. Meh cha die ineh, indem meh dört e gwüssi Azahl Gegner besiegt. Neui Gegner erhöhe de Counter u spezielli Gegner reduziere die Zahl viu schneller als normali Gegner. Ignommeni Basene generiere denne Soldate wo uf dr eigene Site kämpfe.

Wie i de Vorgänger het meh unge rechts dAzahl vo besiegte Gegner u obe rechts e Map wome cha zoome. Was neu isch, isch dAzeig unge links. Die horizontali Linie isch dr Musou Balke, wele sich dürs Kämpfe füllt. Wenner voll isch, chame entweder mit dr Kreis Taste en normale Musou Agriff mache oder mit 2 Finger ufem Touch Screen en alternative Musou Agriff starte, wele wiederum cha verstercht werde indem meh z.B. dVita schüttlet oder gwüssi Touch Kommandos macht. E Musou Agriff isch e super Agriff wo viu Schade macht und/oder es wiits Gebiet trifft. Während em Musou Agriff isch meh usserdem unverwundbar, meh cha de auso au bruche um en gegnerischi Kombo zbreche. Als Bispiu het dr Cao Cao ufem Kreis e Agriff woner so en Isch Wind gege füre schiesst und mitem alternative Musou Agriff dueder um sich ume Isch-Spitze beschwöre, welli dürs hämmere ufem hingere Screen verstercht wärde. Dr grüen vertikal Balke isch sone Art super Musou Balke. Er füllt sich viu langsamer als dr Musou Balke und wird mit eim Finger ufem Touch Screen gstartet und isch extrem starch. Lebensbalke an sich het meh kene, aber wenn meh verletzt wird, gits i de Egge so Blitze wo azeige wie sehr meh verletzt isch. sLebe regeneriert sich denne wieder automatisch.

Zwüsche de Kämpf im Story Modus finde au wieder Minigames mit Touch Kommandos statt wome entweder Gegner bekämpft oder mitemene Ross ire gwüsse Ziit vo A nach B muess ritte. Vor de Kämpf chame usserdem gwunneni Pünkt für Vorteil im Kampf isetze. Was die genau mache, verstahni wege dr Sprachbarriere jedoch leider nid, da es sich um dAsia Version handlet. sZiel isch denne bestimmti Regione i zneh indem meh bestimmti Landteili eroberet. Dadurch si einigi anderi Landteili optional, welli z.T. jedoch Bonis wie neui Waffene gäh. A bestimmte Pünkt i dr Story chömme denne Videos wo ganz guet gmacht si. Nebem Story Modus het sSpieli au en Conquest Modus, wele am Story Modus jedoch sehr ähnlich isch. Im Fun Modus chame denne Minigames wiederhole oder Föteli schiesse u daruf Figure vo Dynasty Warriors iblende. Wer also es Föteli vom Cao Cao im Garte wett ha, cha das so mache. sSpieli bietet usserdem en Galerie Modus, en Enzyklopädie und natürlich Optione. Zum Edit Modus gahni im nächschte Abschnitt ih.

sSpieli het sehr viu Figure inklusive de neuschte usem Dynasty Warriors 7 Extreme Legends. Die verschiedene Figure hei ihri eigenti Waffe mit eigene Kombos, ihri eigente Musou Agriffe und eigeni Statuswert. Neui Waffe findet meh nachem Besiege vo Offiziere, findet se i Chischtene oder bechunnt se als Belohnig für Minigames. Jede Offizier het e eigeni Waffe u cha nur Waffe für sich selber finde. Die Waffene si uf verschiedene Stufene u gseh je nach Stufe anders us. Sie hei en eigene Agriffswert, en Azahl vo maximale Agriff für en Kombo sowie zuesätzlichi Bonus Wert. Nebe dr Waffe chame au Objekt finde wo vo aune Figure chöi verwendet werde. So chame sire Waffe es Element ussueche wo denne zB Gegner laht lah gfrühre und meh cha 5 Objekt usrüschte wo eim en Bonus gäh. sSpieli bietet eim usserdem dMöglichkeit via Edit Modus si eigent Charakter zerschaffe, was ziemlich usgrieft isch: Meh wählt Gschlecht, Grössi, Körperform, Haarschnitt u Farb sowie verschiednigi Chleider, vo welne meh einigi nah cha freischalte. Bi dr Uswahl vo de Waffe chame eifach eini vomene vordefinierte Charakter neh.

Alles in allem hani bim Spiele vo dem Spiel durend sGfüehl gha, dass sie nid nur sBeschte us dr Serie kombiniert hei, sondern dass die neue Element dem Spieli ganz guet düe u chli Abwechslig is Spieli bringe. Vo au de Vita Games woni ha, hani bim Dynasty Warriors Next sGfüehl dasses am meischte usgrieft isch und nebem Disgaea 3 isches mis 2. liebschte Vita Game. An u für sich gits nid viu zkritisiere, es isch halt eifach so, dass sich dSerie langsam chli usglutscht afüehl, well doch sehr viu Spieli release, so isch Dynasty Warriors 7 Extreme Legends ersch grad chürzlich use cho. E neui Serie, en neue Orochi Titel oder en alternativi Gschicht wär interessant. Wieso mache sie nid Mau es Dynasty Warriors wo meh die ganzi Welt eroberet? sSpieli het usserdem ziemlich störendi Popups, d.h. es cha si, dass Gegner en Moment bruche und denne plötzlich “anebeamet” werde.

 

Nah Frage zum Game? Kes Problem, eifach en Kommentar setze, ich wirde die geng wieder aluege ;D

Touch my Katamari (Vita, Asia Import)

Nachdemi vor paar Tag dr gross Blockbuster Uncharted: Golden Abyss reviewet ha, wirds jetze Ziit Mau die chlinere Launch-Games a zluege. I hami als grose Fan vor Serie fürs Touch my Katamari entschiede, luege mir das doch mitnand ah:

Sit 2004 gits dSpieleserie Katamari bereits. Agfange uf dr PS2 hets denne witeri Konsole u au portabli Games i dere Serie gäh u jetze ganz neu, sTouch my Katamari. sGrundlegende Prinzip vo dem Puzzle Game isch relativ simpel: Meh stüret e Ball wo aues asugt wo chliner isch als er selber. Coded worde isches au das Mau wieder vo Bandai Namco Games. Aber chömme mir emau zum Spieli selber:

Schlächt Touch my Katamari isch sehr enttüschend, wells nid anährend so viu Content bietet wie die letzte paar Spieli ir Reihe. Viu isch bloss copy-pasted und es het extrem wenig Content. dNeuerige si zwar interessant, lenke aber vo dr Enttüschig nid gnueg ab. Das Spieli füehlt sich extrem rushed ah u es wär fairer wenns es PSN game für 10 Stuz wäri. I mein, es het nidemau en plat Trophy. Hardcore Fans werde sicher ihre Spass dermit ha, wenn au nid viu, aber für Newcommer empfiehli eher sKatamari Forever uf dr PS3 u wenn meh sich sTouch my Katamari würkli wetti zue lege, empfiehli zwarte bis dr Pries sinkt damit meh sich nid zu abzockt füehlt

Rating: ★★★☆☆☆☆☆☆☆ 


*Fürs Rating gilt 5 als Durchschnittswert

Touch my Katamari

Touch my Katamari

Wie obe adöhnt isch sgrundlegende Spiuprinzip das, dass meh en Ball dür en Landschaft navigiert wo alles azieht wo chliner isch als er selber, wodurch er immer grösser wird. Dadurch dass er grösser wird, chame wiederum Objekt azieh, wo vorane zgross si gsi. Je nach Level chame, wenn meh e gwüssi Grössi erreicht het, neui Levelabschnitt uf due. Im Normalfall het meh e bestimmti Ziit für en level u sLevel endet sobald die Ziit abgloffe isch. Het meh bis dahin mindischtens die gwünschti Grössi erreicht, gwinnt meh sLevel u wird bewertet. dBewertig wird mit Sterne dargstellt: Einisch für dGrössi und einisch fürs Isammle vo gwünschte Objekt. Es git jedoch au es paar spezielli Level. So muess meh i eim zB möglichst viu isammle bis meh en definierti Kaloriezahl erreicht oder imene andere Level muess meh ire bestimmte Ziit aui Items imene Ruum isammle. Au sBearcow Level isch wieder da, i welem meh e möglichscht grossi Chueh oder en möglichscht grosse Bär muess isammle: Sobald meh jedoch so eim achunnt isch sLevel ferti. Also muess meh aune uswiche bis meh gross gnueg isch für die richtig grosse Chüeh bzw. Bäre. Leider het das Spiel en beinahe lächerlichi Azahl vo 13 Levels, worunter eis Level sTutorail isch, Levels wie sBearcow copy pasted si und au sehr viu Maps u Gegeständ us de Vorgänger dinne si.

I dene Levels chame denne au spezielli Sache ufrolle, wie anderi Figure wo dBall stüre oder Gschänkli weili Accessoirs für dSpielfigur beinhalte. Meh bechunnt usserdem Süessigkeite wome denne wiederum in Shops cha usgäh. I dene Shops findet meh denne zB Remixes vo Songs oder Chleidigsstück mit welne meh dr Vater vom Prinz cha bechleide, wele glichzittig als Zentrale zum Level u so wähle. Au hie fallt wieder uf wie wenig Content das Game het und wieviu dervo eifach copy-pasted isch. Es schreit geradezue dernach, dasses grushed worde isch.

Wie bereits i de Vorgänger isch au de Katamari Teil extrem abdreiht. Leider verstahni kes Wort well dAsia Version ke englischi Übersetzig abietet, aber dVideos hei mi definitiv weniger agsproche als i de Vorgänger. Am Endi chunnt denne nah es extrem simpus Minispieli wo dGyro Funktione nutze. Dabi isch meh mitem Ball ufere Platform mit andere Lüt u muess die abe schiesse ohni selber abe zgheie. Nebe dem Minispieli werde usserdem Touch Funktione vor Vita fürs Gameplay brucht. Meh cha so zB dr Ball au via Touch Screen stüre, was aber mire Meinig nach nid anährend so effektiv isch wie mit de beidne Sticks, aber villich liggts au nur dranne dassis mit de Sticks extrem druffe ha. sÄndere vo dr Form vom Ball isch zwar interessant, da viu aber copy-pasted isch, wirds nid gnueg effektiv gnutzt: Es het hie u da Mau es Örtli wos sich lohnt dBall höch zstelle u ab u zue macht meh ne platt um meh ufs Mau uf zsammle, aber sLevel Design isch ganz klar nid guet gnueg uf die neue Funktione usgleit.

Alles in allem isches eifach es grusheds Game wo bsundrigs Fans vor Serie wird enttüsche. Neui Sache si zwar interessant, jedoch nid guet gnueg umgsetzt. Wär e Fan vor Serie isch setts sich nume zuche due wenner unbedingt e portabli Version vomene Katamari brucht, aui Newcommers si miteme Katamari Forever uf dr Ps3 viu besser beratet.

 

Nah Frage zum Game? Kes Problem, eifach en Kommentar setze, ich wirde die geng wieder aluege ;D

Uncharted: Golden Abyss (Vita, Asia Import)

Sodeli, es wird glaubs langsam Ziit für serschte Review u was würdi da besser passe als es Spieli wo ersch i irgendwie angerhaub Mönet id Schwiiz chunnt: Uncharted: Golden Abyss.

Uncharted müessti bsundrigs bi de PS3 Bsitzer inzwüsche en Begriff si, für die wo die Reihe noni kenne: Es isch en Serie vo TPS Spieli wo mit Collectibles, Story Element, chline Rätsel, Chlätterilage u gueter Grafik gspickt si. Bisher si dPS3 Spieli vo Naughty Dog coded worde, dr Vita Teil hingege vo Sony Bend weli unger angerem zB sResistance uf dr PSP gmacht hei. Aber chömme mir emau zum Spieli selber:

 

Sehr guet Uncharted: Golden Abyss isch genau dä must-have Launch Titel wo dVita brucht u sett bi jedem wo sich e Vita zum Launch holt ufem Ichaufszetteli stah. Es brucht sich nid hinger de andere Uncharted zverstecke, zeigt sehr guet was für e Power ir Vita steckt u ghört wohl zu de beschte Vita Games wo isch use cho. Es gseht super us, macht spass u nutzt es paar Funktione vor Vita ganz guet, was sGameplay verbesseret. Leider isch dStory selber aber sehr generisch und nur zum verbinde vo Schauplätz da und dFigure si nid viu meh als Stereotype. Usserdem isch sFehle vom Multiplayer isch grad für en Launch-Titel bsundrigs schad.

Rating: ★★★★★★★★☆☆ 


*Fürs Rating gilt 5 als Durchschnittswert

 

Ingame Uncharted Golden Abyss (Vita, Asia) Aufnahme

Uncharted: Golden Abyss

sSpieli selber spiut vorem erschte Uncharted, isch aber nid würklich mit de andere Uncharted irgendwie verchnüpft. Es spielt gröschteteils in Südamerika, bietet aber trotzdem einiges an Abwechslig i dr Landschaft, so isch meh Mau imene Jungel, Mau ire Ruine, Mau bimene unterirdische See (Bild obe) oder Mau imene brennende Huus. sLetzte döhnt e chli so als würdi sGA dr Route vo Uc2 u vor allem 3 folge wo meh durend mit irgendwelchne Unfäll konfrontiert wird, das isch aber hie nid würkli dr Fau. Es gaht eich eher dRoute vom erschte Teil, es het also bloss wenigi over the top Momänt. Im Spieli chömme usserdem neui Figure vor, doch leider si das bloss es paar flachi Stereotype wo nid würklich en Entwicklig düre göh. Wie scho i de vorherige Uncharted isch dStory selber meh oder weniger bloss wieder da zum die verschiednige Ortschafte mitenand zverbinde, was chli schad isch, well die ganz Schatzsuecherei doch recht Potential hätti

sSpieli bietet leider ke Multiplayer, was ja bim 2 u 3 sehr guet glunge isch gsi. Dafür aber bietet sGA die längschti Einzuspieler Erfahrig vo de bisherige Teili. Meh cha guet mit rund 12 Stund für en erschte Playthrough rechne, wenn meh denne nah die unzählige Collectibles wetti gah sammle gahts namou es bitzeli länger und au im GA chame dr crushing Schwierigkeitsgrad nid füre erscht Playthrough wähle. Die vori erwähnte Collectibles si i dem Teil viu besser gmacht als i de bisherige, bsundrigs well sie ungerschiedlich si: So muess meh zB a bestimmte Stelle äs Bild schiesse. Die gfundene Sache si denne sinnvoll kategorisiert und füehre zure Trophy wenn meh en kategorie ferti het.

Da sich vieli das Game sicher zum Launch wei chaufe, isch natürlich interessant, wie guet das Game dVita Funktione nutzt. Leider nutzt sGA bloss dGyro und dVor- u Rück-Touchscreens. Gyro wird vor allem bim Ziele mit dr Waffe oder dr Kamera für ingame Fotis brucht, was sGameplay jedoch einiges interesssanter macht, well meh so ganz fiin cha ziele, was sehr effektiv isch, bsundrigs bim snipere… u das Game het paar Stelle wome sniperet. Usserdem wirds bi chlinere Sache wie zB sBalanciere ufemene Baumstamm brucht. Die beide Touch Screens hei verschiedeni Funktione: Mitem vordere chame zB zeichne wo dr Drake sell düre chlättere, cha uf dWaffe klicke zum Nachlade und cha Granate zielgenau schiesse. Usserdem wirds bi chlinere Minigames brucht wie zB bi Schiebrätsu oder wenn meh au was muess putze. Dr hinger Touchscreen wird weniger brucht, meh cha dermit zB mitem Snipergwehr zoome, bi Minispieli Sache dreihe oder damit a Seili ufe / abe chlättere.

Alles in allem empfiehli das Spiu aune wo sich e Vita zum Launch hole, vor allem wenn ihr gern Shooter heit oder besser nah Uncharted Fans sit. Aber au Lüt wo nah kes Uncharted gspiut hei, werde mit dem Titu en guete Istieg ine super Spielereihe finde.

 

Nah Frage zum Game? Kes Problem, eifach en Kommentar setze, ich wirde die geng wieder aluege ;D